A COCIÑA DA PRIMAVERA

O libro A cociña da primavera é o terceiro dunha serie sobre o receitario estacional da cociña galega a cargo do gastrónomo Pepe Iglesias. Con 50 receitas e máis de 100 variantes, nace cunha votande esencialmente práctica, a de ensinar a preparar receitas de tempada no máis tradicional e á vez moderno da cociña galega. A cociña da primavera toca temas candentes como a denominación Galicia Calidade, o fraude dos queixos feitos con leite importado de Francia, a utilización de retentores de líquidos na carne galega. Este é un libro comprometido, persoal, que toma partido. Un libro que nos abre os ollos. A concepción do libro, cunha estructura de doado manexo e unhas fotografías de calidade excepcional, fai del un instrumento de prestixio para a nosa cultura gastronómica, situándoo dentro dos máis altos parámetros da edición internacional. Por outra banda o estilo do libro é sempre ameno e mesmo divertido, concebido para chegar ó público e para que este disfrute léndoo ou cociñando con el. Pepe Iglesias é un gastrónomo de recoñecido prestixio, colaborador das principais revistas gastronómicas do estado, crítico gastronómico da guía BMW, ex-restaurador que agora se dedica por completo á investigación gastronómica. A cociña da primavera sitúase na órbita da nova cociña europea e vén recuperar para a modernidade sabores intimamente ligados ós nosos fogóns. A primavera é o tempo do salmón, do salpicón, da horta. E Pepe Iglesias tamén investiga as posibilidades da nosa cociña moderna. Receitas coma a empanada de anguías e pementos verdes, a pescada á galega, o salmón á maionesa de abelás, o salpicón quente de cigalas, o guiso de Coresma de espinacas e ameixas, o xamón asado en salsa de cirolas, a macedonia de pasas con mazás e peras ou a torta de Santiago con laranxa e chocolate van facer as delicias dos que disfrutan do bo comer.